ភ្នំពេញ៖ ទេសរដ្ឋមន្រ្តីរដ្ឋមន្ត្រីក្រសួងឧស្សាហកម្មវិទ្យាសាស្ត្របច្ចេកវិទ្យា និងនវានុវត្តន៍ លោក ចម ប្រសិទ្ធិ បានឆ្លើយបំភ្លឺជូនអង្គប្រជុំព្រឹទ្ធសភាថាច្បាប់ស្តីពីការគ្រប់គ្រងទឹកស្អាត នឹងកាន់តែធានាគុណភាព សុវត្ថិភាព និរន្តរភាព និងតម្លៃសមរម្យ ព្រមទាំងចូលរួមលើកកម្ពស់សុខុមាលភាពសាធារណៈនិងជីវភាពរស់នៅរបស់ប្រជាពលរដ្ឋដោយគ្មានការរើសអើង។

លោកទេសរដ្ឋមន្ត្រីលើកឡើងបែបនេះក្រោយបញ្ចប់សម័យប្រជុំវិសាមញ្ញនីតិកាលទី៤ នាព្រឹកថ្ងៃចន្ទ ទី២០ ខែកុម្ភៈ ឆ្នាំ២០២៣ នៅព្រឹទ្ធសភា ។

ទេសរដ្ឋមន្រ្តី ចម ប្រសិទ្ធិ បានបញ្ជាក់ថា សេចក្តីព្រាងច្បាប់នេះ គឺបានផ្តល់សារសំខាន់បន្ថែមទៀត ក្នុងការកំណត់គោលការណ៍ជាមូលដ្ឋាន លើការជំរុញសក្តានុពលនៃការ អនុវត្តគោលនយោបាយនិងផែនការយុទ្ធសាស្រ្តលើវិស័យទឹកស្អាតដោយអនុលោមតាមច្បាប់និងលិខិតបទដ្ឋានគតិយុត្តជាធរមាន និងធានាប្រសិទ្ធភាពលើការជំរុញល្បឿនការអភិវឌ្ឍសេដ្ឋកិច្ចនិងសង្គមលើគ្រប់វិស័យ។

គួរឱ្យដឹងដែរថា សេចក្តីព្រាងច្បាប់ពីការគ្រប់គ្រងទឹកស្អាតនេះតាក់តែងឡើងមាន ១៥ជំពូក និង ៦៥មាត្រា ត្រូវបានរដ្ឋសភា នៃព្រះរាជាណាចក្រកម្ពុជា អនុម័តយល់ព្រមជាលើកដំបូងចំនួន ១០៤សំឡេង នៃចំនួនសមាជិករដ្ឋសភាទាំងមូល កាលពីថ្ងៃទី៨ ខែកុម្ភៈ ឆ្នាំ២០២៣ នាសម័យប្រជុំរដ្ឋសភាជាវិសាមញ្ញ នីតិកាលទី៦៕